Meqjusa bħala waħda mill-kapolavuri ta’ l-arkitett famuż Malti Lorenzo Gafà, il-knisja parrokkjali Santa Katerina taż-Żejtun bdiet tinbena fl-1692 u tlestiet f’nofs is-seklu 18.

Minkejja li f’dawn is-snin, saru diversi xogħlijiet ta’ manutenzjoni, illum il-kundizzjoni tal-bini marret lura ħafna.

Matul konferenza ta’ l-aħbarijiet, l-Arċipriet taż-Żejtun Fr Eric Overend, f’isem il-Kumitat għar-Restawr, ħabbar li wara studju dettaljat tal-kundizzjoni tal-knisja u rapport li sar minn espert fir-restawr u l-konservazzjoni, f’Novembru li għadda tressqet applikazzjoni quddiem il-MEPA biex jinbeda proġett ta’ konservazzjoni u restawr tal-faċċati kollha tal-knisja.

Jekk dan il-proġett ikun approvat u l-finanzi jippermettu, huwa ppjanat li jibda fi ftit tax-xhur oħrajn u jitlesta f’madwar sitt snin.

L-Arċipriet Fr Overend qal li l-interventi li huwa ppjanat li jsiru fuq il-knisja se jkunu konformi mal-prinċipji etiċi ta’ konservazzjoni u restawr u se tingħata attenzjoni speċjali fin-numru ta’ ġebel li għandhom bżonn intervent biex kemm jista’ jkun jissalva l-bini oriġinali.

Huwa ppjanat li l-ewwel fażi tax-xogħol tkun it-tneħħija tal-kisi bis-siment li sar fis-snin 50 u li qiegħed jikkawża ħafna ħsara minħabba li l-umdità qiegħda tirrovina l-ġebla li sa ftit taż-żmien ilu kienet ġebla tajba. L-akbar ħsarat li fiha l-knisja huma l-gwarniċar, fejn kien hemm saħansitra każi meta waqgħu biċċiet għal fuq iz-zuntier.

Il-Perit Reuben Abela, wieħed mit-tim responsabbli ta’ dan il-proġett qal li f’pajjiżna għandna ħafna wirt storiku iżda min-naħa l-oħra għandna nuqqas ta’ persuni tekniċi u nuqqas ta’ fondi biex imantnu dan il-wirt kif xieraq.

Huwa qal li matul dawn l-aħħar 15-il sena, il-bini tal-knisja taż-Żejtun iddeterjora ħafna, kemm biż-żieda ta’ vetturi li ta’ kuljum jgħaddu minn quddiemha, bil-venda tal-karozzi tal-linja li minkejja li llum tneħħiet, kienet ilha ħdejn il-knisja għal ħafna żmien u anke permezz tad-dħaħen tal-Power Station.

Huwa qal li t-tniġġis kimiku jagħmel ħafna ħsara lill-ġebla Maltija u għalhekk il-bżonn ta’ dan il-proġett huwa urġenti qabel ikun tard wisq u nkomplu nitilfu iżjed mill-oriġinalità tal-bini.Huwa stmat li dan il-proġett jiġi jiswa mal-¢1 miljun.

Għalkemm huwa ppjanat li dan ix-xogħol jinqasam f’fażijiet differenti mifruxin fuq medda ta’ snin, proġett bħal dan jitlob ħafna fondi b’mod kontinwu. Għalhekk, il-parroċċa permezz ta’ kumitat ta’ ġbir ta’ fondi, qiegħda tniedi skema wara l-oħra biex ikun żgurat li l-fondi jinġabru. Minkejja li l-qofol tal-ġbir se jkun ġej mingħand il-parruċċani li s’issa dejjem kienu wara kull proġett, l-Arċipriet qal li qegħdin ifittxu għal iżjed għajnuna finanzjarja fi sponsors jew riżorsi oħrajn.

Min jixtieq jgħin f’dan il-proġett jista’ jagħti s-sehem tiegħu billi jħalli donazzjoni f’wieħed minn dawn iż-żewġ kontijiet bankarji li nfetħu apposta - HSBC – 056 061 60905 jew BOV - 400 169 45627.

charmaine.craus@gmail.com